Lugonovo chama a participar nos actos convocados para celebrar o Día da Patria Galega

O 25 de Xullo é unha festa, a festa en que celebramos ser, recoñecernos, ter e querer os elementos que nos unen nunha comunidade perfectamente identificabel.

Tamén é un día para reivindicar os dereitos colectivos, as aspiracións nacionais.

A patria é a expresión da vontade colectiva, o país que imaxinamos e polo que loitamos.

Sabemos que a loita democrática radical, a defensa dos dereitos dos individuos e a toma de decisións dende abaixo conduce a esa identificación e reclamación colectiva. 

A preocupación polas persoas devén e vai parella coa definición común, democracia é tamén loita nacional.

Lugonovo chama a todas a participar, cada quen á súa maneira, na xornada do 25 de Xullo, o Día da Patria, o Día de Galicia, o día Nacional de Galicia.  A expresar todas a patria que queremos, asentada nos valores solidarios, republicanos e universais.

Lugo, 24 xullo do 2017